A Zaangfahnak Cu A Ngan Tuk!

Zeitluk in minung hi kan sual zongah, ngaichih in Pathian sinah kan kir tthan ah cun, Patian nih a kan zaangfah leng mang ko.

Biaceihtu Pathian

Pathian cu a dingmi Pathian asi i, sualnak kha bia a ceih. A biaceihnak cu, sualnak cungah, a thiannak a lehrulnak langhternak asi. A dingmi Pathian biaceihtu asinak cu bible a hramthok in a dongh tiang zongah kan hmuh khawh (Noah ti lianngan, rai, Israel rawhralnak, Biathlam biaceihnak).

Khamhnak kan hmuh lo ahcun, a donghnak ni ah, bawi tthutdan raangpi ah, kan sualnak cu biaceih kan si te lai (Biathlam 20:11-15). Nifatin kan nunnak zongah, thianghlim tein kan nun a herh. Sualnak kan tuah ahcun, sualnak nih a phichuak a ngei zungzal - atu le zungzal tiang in.

Zaangfahnak A Ngei Mi Pathian

Kan sualnakin kan i mer poah ah cun, Pathian zaangfahnak kan hmu. David nih Israel milu relnak nawl a pek i, cu ruangah cun, Pathian cungah sualnak a tuah (1 Chanrelnak 21). Cu a sualnak ruangah cun Pathian nih Israel dan a tat hna. Asinain, aa ngaihchih i raithawinak a tuah ruangah, Pathian nih a zaangfahnak a langhter i rai(plague) kha a daihter tthan. Pathian nih David sinah a biakamnak kha a tlinter i a hmunmi siangpahrawng sinak thluachuah a pek.

David nih a timi cu, "Bawipa kut cungah cun tla ko ning, zeitintiah anih cu a zaangfahnak a ngan ngaingai" (1 Chanrelnak 21:13) Pathian zaangfahnak cu zeizong vialte nakin a ngan deuh.

Judah Siangpahrang Pawl Sualnak

Sualnak le Pathian nih a mi hna cungah a langhtermi zaangfahnak hi Chanrelnak ah, Siangpahrang David in Siangpahrang Zedekiah tiang kan hmuh. A hlei in Israel le Judah sinah hin voitampi a zaangfahnak a langhter lengmang hna. Siangpahrang lakah khuaruahhar cemmi cu, Siangpahrang Manasseh hi asi. Zeitluk in dah Pathian zaangfahnak hi a ngan hringhran!

Siangpahrang Manasseh: Kum 12 asi in siangpahrang a ttuan. Sualnak taktak hi a tuah, miphun dihlak Pathian sinin a pialter hna. Pagan biakttheng pawl a sak tthan hna, arfi a biak hna, a fale kha raithawinak ah a pek hna. Pathian ralrin peknak zeiah a rel lo i, Assiria mi nih a hnar ah thir an khenh i Babilon ah thir cikcin in an hnuh.
Pathian Zaangfahnak: Thong chung ahcun Manesseh cu aa toidor i thla a cam. Pathian nih a thlacamnak a theih i, a zaangfah i a ngaihthiam. A pennak cu a kirter tthan i, Manasseh zong cu a nunnak aa thleng.

Hi siangpahrang hna tuanbia chungin, cawn awk tampi a um. Nawlngaihnak ah thluachuah hmuhnak le kan sualnak ruangah a chuakmi thil kong (consequences) kha an kan cawnpiak.

Zumhawktlak Pathian

Hi Judah siangpahrang an nun kan zoh tikah hin, pakhat hnu pakhat in, sualnak an tuah tthan lengmang. Pathian bia an tthial, a nawl an ngai loh, an i phorhlaw, siasal te hna an biak. Chankhat hnu chankhat in Pathian bia zei an rello. Nain, fakpi in a lang mi cu, zumhawktlak Pathian a zaangfahnak hi asi.

Hi siangpahrang hna hi, zeitluk in sual hna hmanhsehlaw, ngaihchih taktak in an i mer tthan ahcun, Pathian thinhunnak cu a kir tthan i, a ngaihthiam tthan leng mang hna. Hihi thaazaang a kan petu taktak asi. Sualnak an tuah lengmang mi kan van rel tikah hin, a reltu kan nih zong kan thinhang tawn. Asinain, kan lungthin thlalang asi ti hi hngal hna usih. An tuanbia hna cu, kanmah pumpak khualtlawnnak, a langhtertu ah a cang.

Pathian cu zaangfahnak a ngeimi Pathian asi. A ngaihthiam khawh lomi sualnak nganpi zeihmanh a um lo. Kan sualnak kan i ngaihchih taktak i Pathian hmai ah kan i doitor ahcun, a kan ngaihthiam colh. A dawtnak cu thleidannak a ngei lo i, zungzal in a hmun.

Sualnak kan tuah tikah, phuhrun in kan um mi le Pathian sinin kan i thuh hi, Pathian thinlung kan theih lo ruangah asi. Pathian a thinlung taktak kan theih ahcun, sualnak kan tuah tikah, a mah sinah, a kan ngaihthiam lai ti zumhnak he, kan kir tthan lai.